„Þessi bók er auðvitað bara barn síns tíma“

„Þessi bók er auðvitað bara barn síns tíma,“ segir Hafdís Finnbogadóttir, útgáfustjóri hjá Námsgagnastofnun um kennslubókina Við lesum C, sem Vísir fjallaði um í gærkvöldi og í morgun. Verkefni í bókinni þóttu fordómafull.

„Þetta er það gömul bók að hún hefur ekki verið í dreifingu hér í meira í áratug. Hún er ekkert á boðstólnum hjá okkur í Námsgagnastofnun,“ útskýrir Hafdís ennfremur.

Hún segir alla höfunda sem skrifa námsbækur þurfa að vinna eftir sérstökum gátlista Námsgagnastofnunnar. „Námsefni skal vera laust við fordóma, samkvæmt gátlistanum. Það er reynt að halda í heiðri virðingu fyrir öllum.“

Hafdís segir efni námsbóka metið með reglubundnum hætti. „Í hvert sinn sem kemur að endurútgáfusamningum er hver einasti titill metinn með tilliti til hvort það eigi að gefa hann út aftur eða ekki.“

Reynt er að gera öllum jafn hátt undir höfði í námsefni, að sögn Hafdísar. „Horft er til búsetu, fötlunar, kyns, kynhneigðar, trúar, kynþáttar, stéttar og fleiri þátta. Við reynum að gæta þess í námsefninu að öllum sé gert jafn hátt undir höfði.“

Í frétt Vísis í dag sagði Þórhildur Elvarsdóttir, skólastjóri Varmárskóla, að þessi gamla bók hafi verið notuð sem aukaefni í íslenskukennslu og efnistök í verkefninu farið framhjá kennurum: Hefur Námsgagnastofnun samband við skóla og hvetur þá til að taka ákveðnar bækur úr umferð?

„Við stýrum ekki hvaða efni skólarnir kjósa að nota. Fyrir yngsta stigið eru til yfir 300 titlar í íslensku. Bæði nýtt og aðeins eldra efni. Ef kennari kys að nota gamlar bækur er það eitthvað sem við getum ekki stýrt. Við treystum því að kennarar vegi og meti hvaða efni þeir leggja fyrir nemendur sína,“ segir Hafdís.