Þriðji aðili með upplýsingar um gjaldþrot

Marinó G. Njálsson, fyrrverandi forsvarsmaður Hagsmunasamtaka heimilanna, sagði sögu manns í Bítinu á Bylgjunni í morgun. Honum hafði verið vísað frá banka vegna þess að hann væri á afskriftarlista eftir gjaldþrot. Maðurinn hafði aldrei áður verið í viðskiptum við bankann, sem ætti ekki að hafa upplýsingar um gjaldþrotið.

Í tíð síðustu ríkisstjórnar var lögum breytt þannig að eingöngu tæki einstaklinga tvö ár að fara í gegn um gjaldþrot. Eftir það ætti fólk að vera afskráð af vanskilaskrám og komið með hreint borð. Maðurinn hafði staðfest að búið væri að hreinsa af öllu og fer í banka sem hann hafði aldrei átt í viðskiptum við áður. „Þaðan var honum nánast vísað á dyr vegna þess að hann er á afskriftarlista,“ sagði Marinó í Bítinu.

„Hvað er þriðji aðili að hafa upplýsingar um afskriftir sem viðkomandi hefur fengið hjá óskildum aðila. Ég hefði skilið þetta ef viðskiptabanki mannsins hefði sagt: Þú fékkst hérna afskrifað hjá okkur svo og svo mikið í gegnum þitt gjaldþrot og við ætlum ekki að lána þér aftur. En að einhver aðili út í bæ sé með slíkar upplýsingar sé með slíkar upplýsingar finnst mér einkennilegt.“

Marinó sagðist hafa fengist við persónuverndarmál í 18 ár og hann sæi ýmislegt í þessu máli sem færi á skjön við lög um persónuvernd og meðferð persónuupplýsinga.

„Tilgangurinn með lögunum átti að vera sá að hreinsa fólk svo það hefði hreint borð en bankinn er ekki að koma fram við einstaklinginn á þann hátt. Það sem meira er að í þessu tilfelli er fyrrum viðskiptabanki mannsins enn að reyna að innheimta þær kröfur sem eiga að vera fyrndar. Það er jafnvel ennþá alvarlegra.“

„Hverjir hafa aðgang að þessum lista og á milli hvaða fyrirtækja er hann að ganga?“ spurði Marinó. „Eru það bara bankarnir sem eru að hafa svona samráð? Er þetta einstakt tilfelli? Ég veit það ekki.“