Tvífarar í trommueinvígi aldarinnar

Leikarinn geðþekki Will Ferrell hefur játast áskorun trommuleikarans Chad Smith úr hljómsveitinni Red Hot Chili Peppers, um að etja við hann kappi í trommueinvígi. Einvígi tvífaranna er til styrktar góðs málefnis.

Í myndskeiði sem Chad Smith birti á Instagram aðgangi sínum, skorar hann leikarann á hólm í trommueingvígi og segist jafnframt hafa séð að hann hafi enga hæfileika í trommuleik. Will Ferrell er þó af mörgum talinn einn fremsti kúabjölluleikari heimsins eftir stórkostlega frammistöðu í Saturday Night Live ekki alls fyrir löngu.

Ferrell hefur játast á það að etja kappi við Smith í einvígi aldarinnar. Þeir félagar hafa undanfarið skotið á hvor annan á hinum ýmsu samfélagsmiðlun enda mjög líkir í útliti og fólk ruglast gjarnan á þeim.

Ekki hefur verið staðfest hvar og hvenær einvígið fari fram en gera má ráð fyrir að ansi margir bíði spenntir eftir því.