Viðvörun vegna svifryksmengunar - Fólk ætti að halda sig inni

Svifryk verður líklega yfir heilsuverndarmörkum í Reykjavík í dag en hægur vindur verður og engar líkur á úrkomu og götur eru þurrar. Heilbrigðisbrigðiseftirlit Reykjavíkur fylgist náið með loftgæðum borgarinnar og hefur nú sent frá sér viðvörun vegna þessa.

Hálftímagildi svifryks var 153 míkrógrömm á rúmmetra í morgun við mælistöðina á Grensásvegi en sólarhrings heilsuverndarmörkin eru 50 míkrógrömm á rúmmetra.

Þar sem búist er við þurrvirðri næstu daga og auknum vindi getur ryk þyrlast upp af þurri jörðunni og valdið rykmengun.

„Viðvaranir eru sendar út ef mælistöðvarnar mæla svifryk yfir heilsuverndarmörkum. Það þýðir fyrst og fremst að þeir sem eru viðkvæmir fyrir, til dæmis með astma eða öndunarfærasjúkdóma ættu að halda sig inni,“ segir Bjarni Brynjólfsson, upplýsingastjóri Reykjavíkurborgar.

Fullfrískt fólk finni kannski ekki fyrir neinu en ljóst sé að engum sé hollt að vera úti við þegar svifryk mælist yfir heilsuverndarmörkunum.

Nagladekkin eru talinn vera skaðvaldur í þessum efnum því dekkin spæna upp malbikið og agnirnar skolast ekki í burtu nema í mjög mikilli rigningu eða þær séu þvegnar burtu en göturnar eru hreinsaðar á vorin.

„Þetta ástand er frekar óvenjulegt og þetta gerist ekki oft á ári að svifrykið mælist yfir mörkunum,“ segir Bjarni.

Hægt er að fylgjast með styrk svifryks á vefsíðu Reykjavíkurborgar en þar má sjá kort yfir mælistaði í Reykjavík meðal annars mælistöð á Grensásvegi. Önnur loftgæðafarstöðva Heilbrigðiseftirlits Reykjavíkur er að þessu sinni staðsett við leikskólann Hólaborg við Suðurhóla.