Skuggaleg skilaboð ekki talin hótun

Ónefnd kona var sýknuð í héraðsdómi Reykjaness í dag í máli á hendur henni er varðar hótanir sem ákæruvaldið telur felast í smáskilaboðum sem hún sendi karlmanni sem smitaði hana af lifrabólgu C.

Í dómnum kemur fram að konan hafi sent skilaboðin í bræði og þau hafi ekki falið í sér neina neina hótun. Hún lýsir atvikinu svo að hún og „sponsorinn“ hennar hafi fallið saman og verið í mikilli neyslu fíkniefna. Bæði sprautuðu þau sig. „Í umrætt sinn hafi þau verið búin að vera í neyslu í nokkra daga og margsinnis sprautað sig. Þetta kvöld hafi hreinar nálar verið búnar og þau stödd í Hafnarfirði. Þau hafi ekki viljað fara niður á Landspítala til að fá hreinar nálar og hún því spurt brotaþola hvort óhætt væri fyrir hana að nota nál sem hann var búinn að sprauta sig með. Brotaþoli hafi sagt henni að það væri óhætt.“

Seinna kom á daginn að konan hafði smitast og í dómnum segir að hún hafi talið það jafngilda dauðadómi. Hún sendi manninum skilaboð vegna þeirrar ályktunar sinnar að hann myndi einnig deyja af völdum sjúkdómsins. Skilaboðin voru svohljóðandi: „Thu ert daudur helvitis hommatittur.. munt deyja bradum“.

Skilaboðin voru send voru í gegnum tölvu, nafnlaus og þannig órekjanleg. Maðurinn leitaði strax til lögreglu þegar honum bárust þau. Í ákæru segir að skilaboðin hafi verið til þess fallin að vekja hjá manninum ótta um líf sitt, heilbrigði og velferð. Fyrir dómi sagði maðurinn að hefði nafn konunnar fylgt hefði hann ekki óttast neitt. Sagðist hann ekki hafa viljað að málið hefði fengið þennan framgang, hann vildi helst ekki gefa skýrslu; hann hræddist konuna ekki og þau væru góðir vinir í dag.