Úrskurðurinn hefur áhrif á réttarstöðu fjölda launamanna

 „Tryggingastofnun ríkisins hefur túlkað lögin rangt. Ég lít svo á að úrskurðurinn hafi ótvírætt fordæmisgildi og sé afturvirkur. Þeir sem telja sig hafa verið hlunnfarna um endurhæfingarlífeyri ættu nú að geta sótt rétt sinn,“ segir Magnús Nordahl, yfirlögfræðingur Alþýðusambands Íslands, og bætir við að það sé ljóst að úrskurðurinn geti haft áhrif á réttarstöðu fjölda launafólks.



Úrskurðarnefnd almannatrygginga úrskurðaði í lok síðasta mánaðar að greiðslur endurhæfingarlífeyris frá Tryggingastofnun ættu að hefjast um leið og greiðslurétti úr sjúkrasjóði er lokið.

Stofnunin hefur hingað til túlkað lög um endurhæfingarlífeyri á þann hátt að hefja ætti greiðslur fyrsta dag næsta mánaðar eftir að veikindarétti og greiðslurétti úr sjúkrasjóði er lokið. Þetta hefur orðið til þess að sumir hafa verið bótalausir í allt að mánuð.

Það var Stéttarfélag Vesturlands sem ákvað að láta reyna á málið.

Kona sem var félagi í stéttarfélaginu hafði átt við heilsubrest að stríða. Hinn 8. janúar í fyrra hætti fyrirtækið sem hún vann hjá að greiða henni laun í veikindum. Hún sótti um dagpeninga sem hún átti rétt á hjá sjúkrasjóði Stéttarfélags Vesturlands. Í byrjun apríl sótti húm um endurhæfingarlífeyri hjá Tryggingastofnun en greiðslum úr sjúkrasjóði lauk 8. júní.

Tryggingastofnun taldi að ekki bæri að greiða konunni endurhæfingarlífeyri fyrr en 1. júlí. Konunni var því ætlað að vera bótalausri í 22 daga.

Signý Jóhannsdóttir, formaður Stéttarfélags Vesturlands, segir að það hafi lengi verið verkalýðshreyfingunni mikill þyrnir í augum hvernig Tryggingastofnun hefur túlkað lögin um endurhæfingarlífeyri.

„Stéttarfélögin hafa í sumum tilvikum lengt greiðslurétt um einhverja daga eða vikur svo fólk yrði ekki bótalaust. Hafi það ekki verið hægt hefur fólk orðið að leita á náðir sveitarfélaga eða til ættingja um framfærslu. Við ákváðum því að láta reyna á þetta mál,“ segir Signý.

Haft var samband við Tryggingastofnun í gærmorgun og spurt um viðbrögð við úrskurðinum. Í svari stofnunarinnar segir að svara sé að vænta í dag.