Vilja erlenda ferðamenn í innanlandsflug

Samgöngur Aðeins lítið hlutfall þeirra sem fljúga innanlands eru erlendir ferðamenn. Fjölgun þeirra gæti verið besti möguleiki innanlandsflugsins til að fjölga farþegum. Þetta ein af niðurstöðum nýrrar skýrslu um innanlandsflug um Keflavíkurflugvöll.

Í skýrslunni, sem unnin er af Heklunni, atvinnuþróunarfélagi Suðurnesja, fyrir Samtök sveitarfélaga á Suðurlandi, segir að innanlandsflug megi „muna fífil sinn fegurri“.

Þar segir að farþegum hafi fækkað stöðugt síðustu ár. Á árinu 2012 fóru tæplega 406 þúsund farþegar um Reykjavíkurflugvöll, og hafði þeim fjölgað 7,2 prósent frá árinu á undan. Af farþegunum 406 þúsund voru um 47 þúsund erlendir ferðamenn, um 11,6 prósent.

„Ég gerði mér ekki grein fyrir því að það væru svona fáir erlendir ferðamenn sem nýta sér innanlandsflugið,“ segir Berglind Kristinsdóttir, framkvæmdastjóri Sambands sveitarfélaga á Suðurnesjum og Heklunnar, atvinnuþróunarfélags Suðurnesja.

Hún segir upplýsingar um samsetningu farþega í innanlandsflugi sýna að flugferðir innanlands séu að verða undir í samkeppninni við einkabílinn með batnandi vegakerfi. Helsta sóknarfærið fyrir innanlandsflugið virðist vera að auka fjölda erlendra ferðamanna sem fljúgi innanlands.

Að mati skýrsluhöfunda er Keflavíkurflugvöllur vel í stakk búinn til að taka við innanlandsflugi. Innanlandsfluginu yrði að halda aðskildu frá millilandaflugi, og því þyrfti annað hvort að byggja flugstöð fyrir innanlandsflugið, eða koma því fyrir í byggingum sem þegar eru til staðar.

Tölur frá Flugfélagi Íslands, sem vitnað er til í skýrslunni, sýna að félagið reiknar með að farþegum myndi fækka um 25 til 40 prósent fari innanlandsflugið frá Reykjavíkurflugvallar til Keflavíkurflugvallar.

Berglind telur þessar upplýsingar ekki til þess fallna að slá hugmyndir um að færa innanlandsflugið til Keflavíkur út af borðinu.

„Það fer eftir því hvaða mælikvarða við notum við að meta hagkvæmni. Hvort talað sé um hagkvæmnina af því að samþætta flug á einum stað, eða hvort tekið sé tilliti til ferðatíma fólks,“ segir Berglind.