Þyrlan sótti slasaðan sjómann

Sjómaður á íslenskum togara skarst illa á hendi við vinnu sína um borð, þegar togarinn var staddur djúpt norður af Horni undir kvöld í gær.

Skipstjórinn óskaði eftir að þyrla Gæslunnar sækti hann til að koma honum á sjúkrahús. Búið var vel um sjómanninn um borð þannig að hann var hífður upp í lykkju sigmannsins úr þyrlunni, í stað þess að láta börur síga.

Það sparaði svo mikinn tíma að þyrlan komst alla ferðina í einum áfanga án þess að þurfa að taka eldsneyti á leiðinni, og komst sjómaðurinn því mun fyrr á slysadeild en ella.