Ný reglugerð tryggir endurgreiðslu tímabundið

Kristján Þór Júlíusson, heilbrigðisráðherra, hefur sett reglugerð sem tryggir fólki endurgreiðslu kostnaðar vegna þjónustu sjálfstætt starfandi sjúkraþjálfara þrátt fyrir að þeir starfi án samnings við Sjúkratryggingar Íslands.

Reglugerðin tekur til þjónustu sem veitt er á tímabilinu 7. febrúar sl. til 1. maí næstkomandi. Ráðherra undirritaði ekki rammasamning milli Sjúkratrygginga Íslands og sjúkraþjálfara vegna þess að áherslur samningsins samrýmast ekki forsendum fjárlaga. Þeir sem sækja sér þjónustu sjálfstætt starfandi sjúkraþjálfara, eftir að nýja reglugerðin var sett á, þurfa þó sjálfir að sækja endurgreiðsluna til Sjúkratrygginga Íslands.

„Reglugerðin fjallar um þjónustu sjúkraþjálfara sem reka eigin starfsstofur utan sjúkrahúss við einstaklinga sem eru sjúkratryggðir samkvæmt lögum. Forsenda fyrir endurgreiðslu sjúkratrygginga vegna þjálfunar er að fyrir liggi skrifleg beiðni frá lækni þar sem sjúkdómsgreining kemur fram. Þó er heimilt að víkja frá kröfu um skriflega beiðni læknis vegna bráðameðferðar sem nemur allt að sex skiptum á einu ári,“ segir í tilkynningu frá Velferðarráðuneytinu.

„Sjúkratryggður sem þarf á þjálfun að halda samkvæmt mati á rétt á allt að 20 skiptum í meðferð á ári en í reglugerðinni er kveðið á um heimildir til að fjölga þeim að tilteknum skilyrðum uppfylltum.“