Spyr ráðherra um fegrunaraðgerðir á kynfærum stúlkna

„Ég velti því upp hvort að það sé eitthvað í umræðunni sem hvetji ungar stúlkur til þess að fara í fegrunaraðgerðir á kynfærum sínum og hvort þessar aðgerðir séu í raun algengar,“ segir Líneik Anna Sævarsdóttir, þingkona Framsóknarflokksins, í samtali við Vísi.

Líneik lagði fram fyrirspurn til heilbrigðisráðherra um fegrunar- og lýtaaðgerðir á kynfærum kvenna í þinginu á mánudag. Líneik spurði um ýmsa þætti tengda aðgerðum á kynfærum kvenna, og hvort munur væri á eftir því hvort þær eru  framkvæmdar af læknisfræðilegum ástæðum eða öðrum ástæðum.

„Það eru ýmsir fletir á þessari umræðu. Ég hafði til dæmis aldrei heyrt um hvíttunaraðgerðir  í kringum kynfæri og endaþarm kvenna. Ég velti fyrir mér hégómanum í þessu og hvað knýr fólk til þess að breyta útliti sínu þarna,“ segir þingkonan frá Fáskrúðsfirði.

Geta aðgerðir valdið skaða til frambúðar?

Hún segist hafa heyrt að ljósmæður séu að velta þessu máli fyrir sér. „Ef ljósmæður hafa áhyggjur af þessu er full ástæða til þess að skoða þetta betur. Maður heyrði um það áður fyrr að konur færu í svona aðgerðir eftir fæðingu, þá jafnvel til að laga eitthvað sem fór úrskeiðis þegar þær voru að fæða," segir Líneik.

„En nú heyrir maður um að unglingsstúlkur séu að fara í fegrunaraðgerðir á kynfærum og ég vil vita hvort þetta muni hafa áhrif til langs tíma; hvort að þessar aðgerðir geti haft afleiðingar til frambúðar fyrir þessar stúlkur og hvort þær séu upplýstar nógu vel ef það er raunveruleg hætta sem fylgir þessum aðgerðum.“

Hvar liggja mörkin við læknaeiðinn?

„Ég vil vita hvort það sé eitthvað aldurslágmark í fegrunaraðgerðir á kynfærum, þá meina ég aðgerðir sem eru ekki framkvæmdar að læknisfræðilegum ástæðum. Einnig vil ég vita hver fræðslan er sem konur fá áður en þær fara í aðgerðir af þessu tagi. Auk þess velti ég fyrir mér hvar mörkin liggja við læknaeiðinn. Nú erum við að berjast gegn umskurði á konum og stúlkum í öðrum löndum. Eigum við þá að sætta okkur við að ungar stúlkur fari í lýta- og fegrunaraðgerðir á kynfærum sínum hér á landi?“spyr Líneik.

Hún segir fyrirspurnina vera til þess að fræðast um málið.

„Fyrst og fremst vil ég afla mér upplýsinga um málið. Svona aðgerðir eru væntanlega á kostnað þeirra sem í þær fara.  En ég myndi vilja vita hver ber ábyrgðina ef eitthvað fer úrskeiðis og kostnað samfélagsins af hugsanlegum ófyrirséðum afleiðingum þessara aðgerða. Það er mörgum spurningum ósvarað um þetta og ég vonast til þess að geta fengið einhver svör. Ef þetta er raunverulegt vandamál, þá þurfum við að ræða það,“ segir þingkonan.