Hæstiréttur staðfestir farbann yfir breskum ferðamanni

Hæstiréttur hefur staðfest úrskurð Héraðsdóms Reykjavíkur um farbann yfir karlmanni sem grunaður er um stórfellda líkamsárás eða tilraun til manndráps.

Maðurinn er breskur ríkisborgari, fæddur árið 1977, og er gefið að sök að hafa aðfaranótt 6. febrúar gengið í skrokk á fyrrverandi kærustu sinni á gistiheimili í Reykjavík, brugðið hníf að hálsi hennar, stappað á andliti hennar og reynt að kyrkja hana.

Hlaut konan skurð á hálsi og áverka í andliti en fólk kom henni til aðstoðar eftir að hún öskraði á hjálp. Í kjölfarið var maðurinn handtekinn.

Í úrskurði héraðsdóms segir að maðurinn hafi takmörkuð tengsl við land og þjóð og því sé hætta á að hann kunni að koma sér úr landi og þannig undan málsmeðferð lögreglu. Hann var því úrskurðaður í farbann til 7. mars og hefur Hæstiréttur staðfest þann úrskurð.