"Það er ekki í boði að hætta sjúkraþjálfuninni"

Sjúkraþjálfarar eru nú samningslausir við Sjúkratryggingar Íslands eftir að heilbrigðisráðherra neitaði að skrifa undir nýjan samning við félag þeirra. Það þýðir að sjúklingar þurfa að leggja út margfallt hærri upphæð við komu til sjúkraþjálfara en áður og endurgreiðsluna þurfa þeir að sækja sjálfir í kjölfarið.

Þetta fyrirkomulag hafa margir gagnrýnt, meðl annarra Sif Hauksdóttir, móðir þeirra Baldvins Týs, fjögurra ára og Baldurs Ara 3 ára.

„Þeir eru báðir með ólæknandi vöðvarýrnunarsjúkdóm og greindust þegar þeir voru tæplega þriggja ára og tæplega tveggja ára gamlir. Þeir eru báðir búnir að vera mjög lengi í sjúkraþjálfun því það er í raun eina meðferðin, það eina sem hægt er að gera. Sjúkraþjálfunin er til dæmis fyrirbyggjandi varðandi styttingar á fótum og annað," segir Sif.

„Sjúkraþjálfarar eru einnig mjög stór hluti af vali á öllum hjálpartækjum sem þeir þurfa, þeir sjá hvenær þeir þurfa næturspelkur og hvenær sé kominn tími á að sækja um hjólastól, svo fátt eitt sé nefnt."

Sif ritaði opið bréf til Kristjáns Þórs Júlíussonar, heilbrigðisráðherra, í dag.

„Mér fannst ég ekki geta bara setið heima og tuðað yfir þessu við fólk. Með þessu langaði mig að ná til hans og vekja hann til umhugsunar um þá stöðu sem hann er að setja fólk í með ákvörðun sinni."

Synir Sifjar þurfa hvor um sig að fara til sjúkraþjálfara tvisvar sinnum í viku. Fyrir það þarf hún nú að leggja út samtals um 30 þúsund krónur á viku. Og Sif segir ýmsar upplýsingar vanta til fólks í hennar stöðu, hvernig og hvenær endurgreiðslan eigi að eiga sér stað.

„Ég á ekki endalausa þrjátíuþúsundkalla til að punga út í hverri viku, þangað til tekin verður ákvörðun um hvernig endurgreiðslukerfið eigi að virka eða þangað til samningar verða endurnýjaðir. Strákarnir mínir verða að fara í þessa sjúkraþjálfun, það er ekkert í boði að hætta henni. Við verðum bara einhversstaðar að grafa upp þessar 30 þúsund krónur á viku."