Víða hálka

Nokkuð djúp lægðarmiðja er á hringsóli fyrir austan fjall og beinir hún éljum og snjókomu í vaxandi mæli að Austurlandi fram á kvöld, frá Þistilfirði, austur og suður úr á Hornafjörð. Eins hvessir og um og eftir miðjan dag. Norðaustan 15-20 metrar á sekúndu og reiknað með stórhríð á fjallvegum. Á láglendi verður smám saman krapi og jafnvel slydda. Þetta kemur fram á vef Vegagerðarinnar.

Færð og aðstæður

Á Hellisheiði, í Þrengslum og á Sandskeiði er hálka. Það er hálka og snjóþekja á Suðurlandi en hálkublettir og hálka á Suðvesturlandi. Flughált er í Grafningnum. Á Vesturlandi er hálka og snjóþekja á flestum vegum. Flughált er á Útnesvegi.

Á Vestfjörðum er hálka eða snjóþekja á flestum vegum og éljagangur mjög víða. Ófært er á Klettshálsi. Flughált er á Innstrandavegi frá Staðarskála í Bitrufjörð. Þæfingur og stórhríð er á Steingrímsfjarðarheiði og Gemlufallsheiði. Snjóflóðahætta er á Súðavíkurhlíð.

Snjóþekja og hálka er á Norðurlandi og víða þæfingur. Éljagangur eða snjókoma er mjög víða. Hálka eða snjóþekja er á Austurlandi og sumstaðar skafrenningur. Þæfingur er á Háreksstaðaleið, Möðrudalsöræfum og Vopnafjarðarheiði. Á Suðausturlandi er hálka.