Kaupa fimm ný skip fyrir 14 milljarða

HB Grandi mun að öllum líkindum fá fimm ný skip afhent á næstu þremur árum. Skipin fimm kosta alls um 14 milljarða króna. Um er að ræða eina mestu fjárfestingu í íslenskum sjávarútvegi um áratugaskeið.

HB Grandi tilkynnti í gær að stjórn fyrirtækisins hefði ákveðið að ganga til samninga við tyrkneska skipasmíðastöð um smíði á þrem ísfisktogurum. Gangi allt að óskum þá verða skipin þrjú afhent 2016 og 2017. Hjá HB Granda starfa um 950 manns.

Kostnaður við skipin þrjú er um 7 milljarðar króna en fyrir er skipasmíðastöðin með tvö uppsjávarskip í smíðum fyrir aðra 7 milljarða. Alls er fjárfestingin um 14 milljarðar króna - sú mesta í sögu HB Granda.

„Við teljum þetta ágætis tímapunkt í að fara í þetta verkefni,“ segir Vilhjálmur Vilhjálmsson, forstjóri HB Granda. „Við erum með traustan og góðan efnahag. Auk þess fáum við góða fjármögnun. Það er verkefnaskortur í skipasmíðastöðum og fengum hagstætt tilboð.“

Ísfiskstogarar hannaðir af Íslendingum

Leita þarf langt aftur í tímann til að finna viðlíka endurnýjun á skipaflota líkt og HB Grandi er núna að ganga í gegnum. Sífellt fleiri sjávarútvegsfyrirtæki veðja nú á að fjárfesta í ísfisktogurum sem eru að stórum hluta hannaðir af Íslendingum.

„Við erum að horfa til framtíðar með þessi skip. Þau koma með allan afla að landi og sjáum fram á orkusparnað. Við erum með mengunarvarnarbúnað um borð í þessum skipum og þau eyða minna af olíu. Þessi skip eru á allan hátt hönnuð með það fyrir augum að raska umhverfi sem minnst,“ segir Vilhjálmur.

Talsverðar breytingar eru að eiga sér stað í íslenskum sjávarútvegi. Uppsjávarskip hafa verið seld úr landi og sjómönnum sagt upp störfum. Störf hafa á ný verið að færast í land. Er HB Grandi að hverfa frá útgerð á uppsjávarskipum?

„Aldeilis ekki,“ svarar Vilhjálmur. „Þessi tvö uppsjávarskip sem við erum með í smíðum eru mjög öflug og góð. Þau eru mun afkastameiri en skipin sem við erum með í dag.“