Risamarglyttu rekur á land

Risamarglytta af ónefndri tegund, um einn og hálfur metri í þvermál, fannst við strendur eyjunnar Tasmaníu í síðasta mánuði. Þessu greinir BBC frá í dag.

Josie Lim og fjölskylda hennar sáu fyrst skepnuna og tóku af henni myndir, en hún er um þessar mundir rannsökuð af vísindamönnum í Ástralíu. Dr. Lisa-ann Gershwin, rannsóknarvísindamaður fyrir ástralska ríkið, segir að þessi tegund risamarglyttna sé ekki óþekkt en enn eigi eftir að flokka hana og finna henni nafn.

„Þetta eru stórkostleg dýr,“ segir Gershwin um þessa ónefndu tegund. „Þær líta út eins og matardiskur ofan á tusku.“