„Það heldur enginn fund í nafni félags nema stjórn félagsins“

Ólafur Ingi Hrólfsson, meðlimur Málfundafélagsins Óðins, segist enn vera formaður félagsins. Hann segir fund félagsins sem haldinn var fyrr í kvöld vera ólöglegan, en á fundinum var nýr formaður kjörinn auk átta manna stjórnar.

„Við sendum lögmann á þennan fund þeirra, hann fór í gegnum málin með þeim, og að áliti hans og annarra lögmanna er hann kolólöglegur og hefur ekkert vægi,“ segir Ólafur í samtali við Vísi.

Forsaga málsins er sú að aðalfundur Óðins, sem er félag sjálfstæðismanna í launþegasamtökum, átti að fara fram í kvöld en um klukkustund fyrir fundinn fengu félagsmenn tölvupóst þess efnis að fundinum yrði frestað vegna óviðráðanlegra ástæðna. Fundurinn var engu að síður haldinn og var Eiríkur Ingvarsson kjörinn nýr formaður, en æðsta vald flokksins þarf að staðfesta kjörið.

„Stjórnin kemur til með að senda út tilkynningu á morgun og fundarboð og svo höldum við okkar fund,“ segir Ólafur og bætir því við að hann sé lítið fyrir hasar og læti. „En það heldur enginn fund í nafni félags nema stjórn félagsins.“