Loftið í ræktinni getur skaðað heilsuna

Vísindamenn frá Hollandi og Portúgal birtu nýverið rannsókn sem sýnir gæði lofts inni á líkamsræktarstöðvum.

Vísindamennirnir könnuðu mengunarefni í loftinu í ellefu mismunandi líkamsræktarstöðvum á háannatíma. Í rannsóknum þeirra kom fram að mikið magn af ryki, formaldehýði og koltvíoxíði fannst í loftinu, sérstaklega í lokuðum rýmum þar sem hópatímar eru kenndir.

Samkvæmt rannsókninni getur mikið magn þessara efna leitt til astma eða annarra öndunarfærasjúkdóma. Þá getur of mikið af koltvíoxíði leitt til ofþreytu.