Stærsta flugvél sem lent hefur í Reykjavík

Flugvél bandaríska flughersins lenti á Reykjavíkurflugvelli í gærkvöldi, en vélin er sú stærsta sem lendir á vellinum.

Jón Karl Einarsson, starfsmaður Flugþjónustunnar á Reykjavíkurflugvelli, segir í samtali við Vísi að vélin sé af gerðinni Boeing C17 Globemaster og hafi lent á Íslandi til að taka eldsneyti.

Jón Karl segir vélina upphaflega hafa átt að lenda í Keflavík. „Skyggnið var hins vegar of slæmt í Keflavík. Það var lág skýjahæð og vélin gat ekki lent.“ Því hafi verið ákveðið að lenda á Reykjavíkurflugvelli sem er varaflugvöllur fyrir Keflavíkurflugvöll.

Vélin lenti um klukkan 22:45 í gærkvöldi og fer af landi brott síðar í dag. Vélin kom frá herstöð flughersins í Þýskalandi, en er á leið til Anchorage í Alaska.

Aðspurður hvort þetta sé stærsta vél sem lent hafi á Reykjavíkurflugvelli segir Jón Karl svo sennilegast vera. „Það eru líklegast Boeing 757 vélar Icelandair sem áður voru þær stærstu til að lenda á Reykjavíkurflugvelli.“

Jón Karl segir engan farm vera um borð í vélinni. „Engin vopn, engar sprengjur, ekki neitt. Hún er alveg tóm.“

Friðþór Eydal, upplýsingafulltrúi Isavia, segir flugvélar af þessari gerð bæði hafa lent í Vestmannaeyjum þegar háhyrningurinn Keikó var fluttur til landsins, en einnig á Akureyri.

Lengd C17-vélarinnar er 53 metrar, vænghaf 51,75 metrar og stélhæð 16,8 metrar. Tóm er vélin um 128 tonn en hámarksþyngd við flugtak rúm 265 tonn.

.