Ríkið virti ekki lög við makrílúthlutun

Jón Bjarnason, fyrrverandi sjávarútvegs- og landbúnaðarráðherra, fór ekki að lögum við úthlutun makrílkvóta til útgerða. Hún gæti því bakað skaðabótaskyldu gagnvart þeim útgerðum sem minna báru úr býtum.

Þetta er álit umboðsmanns Alþingis en Vinnslustöðin í Vestmannaeyjum kærði úthlutunina.

„Við munum láta okkur fróðari menn um svona álit fara betur yfir þetta,“ segir Sigurgeir Brynjar Kristgeirsson, framkvæmdastjóri Vinnslustöðvarinnar.

„En við hljótum að hugleiða þetta mjög vandlega og þá með það í huga að fara í skaðabótamál við ríkið.“