Þingmaður spyr um öryggi í sjúkraflugi

„Þetta snýst um að þessi þjónusta sé tryggð og að fólk búi ekki við falskt öryggi, haldi að það geti fengið vélar hvenær sem er og svo eru þær ekki tiltækar,“ segir Silja Dögg Gunnarsdóttir, alþingismaður Framsóknarflokks, um fyrirspurn um sjúkraflug sem hún beinir til Kristjáns Þórs Júlíussonar heilbrigðisráðherra.

Silja kveðst hafa heyrt í mörgu fólki um sjúkraflugið í kjördæmaviku á Suðurlandi í síðustu viku. „Viðbrögðin sem ég fékk voru þau að auðvitað ætti þetta að vera á einni hendi,“ segir Silja og vísar þar til hugmynda um að allt sjúkraflug í landinu verði á vegum Landhelgisgæslunnar. Eins og kunnugt er annast Mýflug sjúkraflug á stórum hluta landsins með flugvél sem gerð er út frá Akureyri.

Ekki flugvél fyrir kvalinn mann

Að sögn Silju ræddi hún sjúkraflugið við konu eina í Öræfasveit. „Maðurinn hennar veiktist hastarlega núna eftir áramótin. Hún hringdi til að biðja um sjúkraflug en það var engin flugvél laus. Hún spurði þá hvort ekki væri hægt að senda þyrlu frá Landhelgisgæslunni en fékk þau svör að það borgaði sig ekki. Hún ætti að keyra á móti sjúkrabíl sem hún gerði með manninn sárkvalinn í aftursætinu. Hann fór síðan í aðgerð á spítala í Reykjavík og er þar enn,“ segir Silja.

Í fyrirspurn Silju er spurt hversu oft á árunum 2008 til 2013 sjúkraflugvél Mýflugs hafi ekki verið tiltæk þegar eftir henni var kallað og hversu marga daga í fyrra varaflugvélar Mýflugs hafi verið í útleigu erlendis eða bundnar í öðrum verkefnum. Einnig er spurt um hvenær megi vænta niðurstöðu athugunar á því hvort hagkvæmt sé fyrir ríkið að hafa sjúkraflugið allt á einni hendi, það er hjá Landhelgisgæslunni.

„Þær upplýsingar sem ég hef fengið benda allar í eina átt; að það hljóti að vera hagkvæmara fyrir okkur að hafa sjúkraflugið á einni hendi. Þá finnst mér borðleggjandi að Landhelgisgæslan taki við þessu verkefni vegna þess að hún er með búnað og vel þjálfað starfsfólk,“ segir Silja, sem sjálf hefur lagt til flutning Landhelgisgæslunnar á einn stað; á Suðurnes.

„En aðalatriðið er öryggið, og það snertir alla út um allt land. Er þessi þjónusta eins góð og við viljum að hún sé og við höldum að hún sé?“ spyr Silja sem bíður nú svara heilbrigðisráðherra. „Þegar komið er svar sjáum við hvort við búum við toppöryggi eða ekki. Eða eru fleiri en þessi kona að lenda í því að vélar eru ekki tiltækar þegar á þarf að halda?“