„Bankinn sýndi mikla óbilgirni gagnvart okkur“

„Bankinn sýndi mikla óbilgirni gagnvart okkur í þessu máli, rétt eins og gagnvart þúsundum Íslendinga,“ segir Jóhann Sigurðarson leikari um mál félagsins Tölt ehf, sem Jóhann átti ásamt Hilmi Snæ Guðnasyni leikara.

Tölt ehf var stofnað árið 1999, í kringum áhugamál Hilmis og Jóhanns; Hestamennsku. Það var úrskurðað gjaldþrota árið 2010. Leikararnir keyptu jörð á Suðurlandi stuttu eftir að félag þeirra var stofnað, og tóku fyrir því lán frá Kaupþingi í erlendri mynt. Þegar gengi íslensku krónunnar féll jukust skuldir félagsins til muna.

„Sannleikurinn er sá að við keyptum jörð fyrir 80 milljónir. Tölt stóð vel þegar kaupin voru gerð, annars hefði ekki fengist lán. Hluthafar Tölts ehf lögðu 22 milljónir í kaupin. Fengið var lán hjá Kaupþingi uppá 58 milljónir í erlendri mynnt til 40 ára.Tekjur af jörðinni stóðu undir afborgun af láninu auk framlags frá hluthöfum,“ útskýrir Jóhann.

Í hruninu féll krónan og erlenda lánið hækkaði. Lánið hækkaði, og þar af leiðandi skuldir félagsins. „Í hruninu fór lánið hæst í tæplega 150 milljónir. Bankinn brást við með því að setja félagið í þrot. Lánið var síðan dæmt ólöglegt og fært niður á upphafsreit. Bankinn fékk jörðina, og seldi aftur og tapaði ekki neinu. Hluthafarnir hinsvegar töpuðu sínu framlagi,“ segir Jóhann ósáttur.

Samkvæmt síðasta ársreikningi Tölts námu skuldir félagsins um 87 milljónir. Lýstar kröfur í þrotabúið voru aftur á móti 168,4 milljónir króna.

Jóhann segir augljóst að gengislánið sem þeim hafi verið veitt hafi verið gölluð vara. „Bankinn sýndi mikla óbilgirni í þessu máli. Þetta er aðeins eitt dæmi um það hvernig bankarnir gengu fram gagnvart einstaklingum og fyrirtækjum  á meðan óvissa ríkti um gengislánin. Nú spyrja menn sig hvort ekki eigi að sækja skaðabætur á föllnu  bankana, sem höfðu fyrirtæki og fasteignir af fólki og lögaðilum í stórum stíl, en lán sem þeir veittu til kaupa voru ólögleg, sem sagt gölluð vara.