Karlmenn fyrir dóm vegna innflutnings 30 þúsund MDMA taflna

Ríkissaksóknari hefur ákært tvo karlmenn fyrir að hafa staðið að innflutningi á 30.225 töflum af efninu MDMA frá Danmörku til Keflavíkurflugvallar í ágúst 2011. Efnin hafi verið ætluð til sölu hér á landi. Málið var þingfest fyrir Héraðsdómi Reykjaness í gær.

Annar maðurinn á að hafa fengið hinn til verksins með sér og veitt honum leiðbeiningar um ferðatilhögun, afhent honum síma og greiðslukort til að greiða fyrir ferðina.

Hinn síðarnefndi fór til Gautaborgar og síðar til Kaupmannahafnar og Amsterdam. Í ákærunni sem fréttastofa hefur undir höndum segir að maðurinn hafi tekið við fíkniefnunum í Amsterdam og flutt þau með flugi til Íslands frá Kaupmannahöfn. Efnin faldi hann í farangri sínum þar sem tollverðir fundu þau.

Stuttu eftir komu mannsins til landsins fundust fíkniefni, 1,6 grömm af amfetamíni og tafla af MDMA, á hinum manninum, þeim sem ákærður er fyrir að skipuleggja ferðina. Er hann jafnframt ákærður fyrir vörslu þeirra efna.