Óttast ekki refsiaðgerðir af hálfu ESB

Sjávarútvegsráðherra óttast ekki refsiaðgerðir af hálfu Evrópusambandsins vegna makríldeilunnar. Ráðherra áformar að úthluta makrílkvóta innan tíðar. Makrílviðræður eru í hnút og engin lausn í sjónmáli. Þetta kom fram í kvöldfréttum Stöðvar 2 í kvöld.

„Ég óttast í sjálfu sér ekki refsiaðgerðir vegna þess að þær byggja á ofveiði sem er alls ekki af okkar hálfu,“ segir Sigurður Ingi Jóhannsson sjávarútvegsráðherra.

„Það sem við þurfum að velta fyrir okkur í stóra samhenginu og óttumst er að ef að allir fara út með sínar kröfur og grunnurinn sé í kringum milljón tonn, þá er hætta á því að það skapist ofveiði í þessum stofni.“

Hjólaleiðir á Íslandi

Nýsköpunarverðlaun forseta Íslands voru veitt í 19. sinn við hátíðlega athöfn á Bessastöðum í dag. Að þessu sinni var það verkefnið Hjólaleiðir á Íslandi sem hlaut verðlaunin en það fól í sér að koma íslenskum hjólaleiðum á kortið í Evrópu.

Hjólaleiðir á Íslandi hlaut Nýsköpunarverðlaun forseta Íslands sem veitt voru á Bessastöðum í dag. Þetta er í 19. sinn sem þessi verðlaun eru veitt.

„Við erum að gera framlengingu á hjólreiðaneti sem er nú þegar til staðar. Sú leið sem við kynnum í okkar verkefni er framlenging á þessu neti hingað til lands,“ segir Gísli Rafn Guðmundsson, annar vinningshafa. „Þetta er svona tvíþættur ávinningur, bæði fyrir ferðaþjónustuna og okkur íbúa landsins,“ segir Eva Dís Þórðardóttir.

Framúrskarandi fyrirtæki

Samherji, Já og Eignamiðluin voru í dag valin framúrskarandi fyrirtæki ársins 2013. Bjarni Benediktsson fjármálaráðherra veitti verðlaunin á Hilton Nordica í dag. Valin eru framúrskarandi fyrirtæki í þremur stærðarflokkum sem hljóta þessi árlegu verðlaun. Samherji var efst í hópi stórra fyrirtækja en Eignamiðlun var efst á lista lítilla fyrirtækja.

462 fyrirtæki eru á lista Framúrskarandi fyrirtækja í ár sem er um 1,4 prósent af þeim 33.000 fyrirtækjum sem skráð eru á Íslandi.