Góður árangur af lestri nemenda fyrir hunda

Samtökin Vigdís – Vinir gæludýra á Íslandi bjóða upp á svokallaðan hundalestur í bókaversluninni Iðu í Lækjargötu síðasta laugardag í hverjum mánuði nú í vetur. Þá mega börn á aldrinum sex til 12 ára koma og lesa fyrir hund sér til ánægju og yndisauka, að sögn Margrétar Sigurðardóttur, formanns Vigdísar.

„Fyrsta verk samtakanna, sem voru stofnuð í fyrra, var að koma á fót hér á landi lestrarverkefni að bandarískri fyrirmynd. Í Bandaríkjunum kallast verkefnið READ eða Reading Education Assistant Dog. Þar hefur það reynst sérlega vel til að hvetja börn til yndislesturs og ekki síður til að liðsinna börnum með lestrarerfiðleika, til dæmis fjöltyngdum börnum og lesblindum,“ greinir Margrét frá.

Hún segir tilraunaverkefninu hér á landi hafa verið komið á í einum grunnskóla í fyrravor og því er haldið áfram nú. „Þá lesa nokkrir nemendur vikulega upphátt fyrir hund og sjálfboðaliða. Kennarar, foreldrar og börn hafa verið mjög ánægð með þessa lestraraðferð.“

Sjálf er Margrét að gera rannsókn á aðferðinni í meistaranámi sínu í Háskóla Íslands. „Niðurstöður rannsókna sem gerðar hafa verið erlendis á áhrifum þessarar aðferðar eru allar á sama veg. Áhugi á lestri eykst og sömuleiðis lestrarhraði og lesskilningur. Sjálfstraust barnanna eflist og viðhorf til bókalesturs verður jákvæðara.“

Margrét leggur áherslu á að þeir sem hafi áhuga á slíku verkefni hafi samband við samtökin til að fá leiðbeiningar og ráð og mat á hundunum þar sem samtökin hér eru í samstarfi við READ-samtökin í Bandaríkjunum.

Þeir sem vilja skrá börn sín í lestrarstund í Iðu geta gert það hér og hefst skráning nú um helgina.

Þeir sem ekki eru félagsmenn greiða 500 krónur fyrir skiptið, en félagsmenn geta komið með barn í lestur án endurgjalds.