Lífið

Árgangsmót sameinar Eyjamenn í Hörpu

Gunnar Leó Pálsson skrifar
„Þetta er nokkurs konar árgangsmót Eyjamanna, því þarna hittast margir gamlir félagar og rifja upp góð kynni,“ segir Bjarni Ólafur Guðmundsson, líklega best þekktur sem Daddi, skipuleggjandi hátíðartónleika Ástgeirs Ólafssonar, Ása í Bæ.

Tónleikarnir fara fram á laugardagskvöldið í Eldborgarsal Hörpu. „Þetta eru þriðju Eyjatónleikarnir sem fram fara í Hörpu og það hefur allt verið uppselt. Við erum ótrúlega þakklát fyrir þessar frábæru viðtökur.“ Eyjatónleikarnir í Hörpu eru nokkurs konar árgangsmót Eyjamanna því þar hittast oft gamlir félagar úr Eyjum.

„Eftir fyrstu Eyjatónleikana, hátíðartónleika Oddgeirs Kristjánssonar sem fram fóru í nóvember 2011, fékk ég eina kvörtun. Kvörtunin var sú að hléið væri ekki nógu langt, því fólk vildi meiri tíma til að spjalla,“ útskýrir Daddi.

Hann hefur hins vegar lengt hléið og verður því hléið á hátíðartónleikum Ása í Bæ sérstaklega langt svo Eyjamenn geti spjallað vel saman. „Þó svo þetta séu ekki allt Eyjamenn þá er svo ótrúlega mikið af fólki sem tengist Eyjum, hefur stoppað þar á vertíð, verið á sjó eða í annarri vinnu.“

Á tónleikunum koma fram nokkrir af þekktustu söngvurum þjóðarinnar eins og Pálmi Gunnarsson, Guðrún Gunnarsdóttir, Sigríður Beinteinsdóttir, Eyþór Ingi Gunnlaugsson, Ingó Veðurguð og fleiri þekktir söngvarar. „Það koma líka fram margir ungir og efnilegir söngvarar úr Eyjum.“

Hljómsveitin Heimaslóð mun sjá um undirleikinn en hana skipa Birgir Nielsen Þórsson, Eiður Arnarsson, Jón Elvar Hafsteinsson, Matti Kallio, Sigurður Flosason, Kjartan Hákonarson og hljómsveitarstjórinn Þórir Úlfarsson. Tónleikarnir hefjast klukkan 20.00 og fara fram í Eldborgarsalnum í Hörpu.

Sigurður Flosason og Pálmi Gunnarssonvisir/vilhelm
Jón Elvar Hafsteinssonvisir/vilhelm
Flottur hópurvisir/vilhelm
Eyþór Ingi Gunnlaugsson, Pálmi Gunnarsson og Jón Elvar Hafsteinssonvisir/vilhelm


Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.