40% fjölgun ferðamanna í janúar

Það voru um 46 þúsund ferðamenn sem fóru úr landinu í janúar í ár samkvæmt talningum Ferðamálastofu. Það eru um 13.400 fleiri en í janúar á síðasta ári. Hér er því um að ræða 40,1% fjölgun ferðamanna í janúar milli ára.

Langfjölmennasti hópur ferðamanna voru Bretar en þeir voru 35,5% af heildarfjölda ferðamanna. Í öðru sæti voru Bandaríkjamenn með 14,5% af heildarfjölda.

Af einstaka þjóðernum þá fjölgaði Bretum einnig langmest milli ára en það voru 6.545 fleiri Bretar sem komu í janúar í ár en í fyrra. Bandaríkjamenn voru 1.716 fleiri, Kanadamenn 616 fleiri og Frakkar 600 fleiri.