Sakar formann Starfsgreinasambands um trúnaðarbrest

Formaður Starfsgreinasambandsins hefur gert sig sekan um alvarlegan trúnaðarbrest að mati formanns Framsýnar á Húsavík. En Framsýn og Verkalýðsfélagi Akraness hafi verið tilkynnt að félögin verði ekki með í samfloti í samningaviðræðum við Samtök atvinnulífsins.

Fjórtán verkalýðsfélög af nítján aðildarfélögum Starfsgreinasambandsins felldu kjarasamninga ASÍ við Samtök atvinnulífsins sem gerður var  í Karphúsinu hinn 21. desember, en formaður Starfsgreinasambandsins hafði mælt með því að samningarnir yrðu samþykktir. Formenn Framsýnar og Verkalýðsfélags Akraness og nokkrir aðrir mæltu hins vegar ekki með samningunum.

Björn Snæbjörnsson formaður Starfsgreinasambandsins og Einingar Iðju á Akureyri hefur tilkynnt ríkissáttasemjara hvaða félög muni standa saman að samningagerð í framhaldsviðræðum við Samtök atvinnulífsins undir forystu hans. Þar er ekki gert ráð fyrir Verkalýðsfélagi Akraness og Framsýn á Húsavík og segir formaður Framsýnar að þar með hafi formaður Starfsgreinasambandsins útilokað félögin frá samfloti.

„Já hann hefur gert það. Hann sendi okkur bara póst í gær þar sem fram kom að okkar nærveru væri ekki óskað. Þeirra sem hafa barist hvað mest fyrir hækkun lægstu launa á Íslandi. Mér finnst þetta ömurlegt og í sjálfu sér stórfurðulegt að formaður Starfsgreinasambandsins sem á að leiða okkur saman skuli gera þetta. Þetta er ávísun á frekari sundrungu,“ segir Aðalsteinn Baldursson formaður Framsýnar.

Eruð þið að útliloka þessi félög frá því samstarfi sem þarna er á ferðinni?

„Nei, þetta er bara hópur sem tók ákvörðun um að vinna saman og við erum auðvitað tilbúin til að vinna með öllum, eins og við ákváðum þegar við stofnuðum þennan hóp. Við viljum ræða við Flóabandalagið, verslunarmenn og iðnaðarmennina líka. Þannig að við viljum vera í góðu samstarfi við alla aðila,“ segir Björn.

Þótt að hann sé talsmaður þessa hóps þá komi hann að málinu sem formaður Einingar-Iðju enda samningsumboðið hjá einstökum félögum.

„Ég held að hann verði að endurskoða sína stöðu. Þótt hann tali þannig að hann fari fram fyrir hönd Einingar-Iðju þá er hann um leið formaður Starfsgreinasambandsins og ég held að hann ætti að skoða sinn gang,“ segir Aðalsteinn.

Endurspeglar þetta á einhvern hátt ágrening um áherslur við samningaborðið?

„Það held ég ekki. Við vorum öll saman í að gera kröfugerð starfsgreinasambandsins (fyrir samningana í desember). Við erum öll með okkar starfsgreinar sem þarf að hlúa að og þetta er ekki ágreiningur um svoleiðis hluti,“ segir Björn Snæbjörnsson.