Gekk eins og í sögu

„Þetta hefur gengið vonum framar, viðtökurnar hafa verið ótrúlega góðar,“ segir Eyvindur Karlsson, kynningarfulltrúi Allir lesa, landsleiksins í lestri sem lauk á sunnudag á degi íslenskrar tungu. Leikurinn fór fram á lestrarvefnum allirlesa.is en hann er sá fyrsti sinnar tegundar í heiminum. Hópar af öllum stærðum og gerðum lásu til sigurs en á þeim fjórum vikum sem keppnin stóð skráðu 4.236 einstaklingar í 326 liðum lestur upp á um 70.000 klukkustundir alls.

„Það hafa verið mjög fjölbreytt lið sem voru stofnuð, bæði eru það áhugamál og sömuleiðis vinnustaðir og skólar sem sameinuðu lið. Þessu hefur verið rosalega vel tekið af öllum aldurshópum og úti um allt land,“ segir Eyvindur.

Ýmsar athyglisverðar tölur komu fram í keppninni. Konur skráðu nær ¾ af öllum lestrinum, lestur barna á aldrinum 0-15 ára var alls um 40% af heildarlestrinum í keppninni og íbúar Vestmannaeyja lásu mest af öllum sveitarfélögum.

„Skólarnir voru mjög öflugir sem skýrir að einhverju leyti hvað börnin eru stór hluti, svo er spurning hvað veldur þessari kynjaslagsíðu. Maður gerir frekar ráð fyrir að það sé aðeins jafnara hlutfall á milli kynjanna almennt.“

Að sögn Eyvindar er síðan enn nothæf þó að keppni sé lokið. „Margir monta sig af íþróttaiðkun sinni á netinu þar sem þeir skrá alla hreyfingu og svoleiðis, þetta er bara þannig fyrir lestur. Þú getur séð hvað þú lest mikið og hverjar þínar lestrarvenjur eru. Keppnin heldur áfram og það er aldrei að vita nema að það bætist við notagildið á vefnum.“