Yfirgefnir bílar tefja vinnu við snjóhreinsun

Bílar sem sitja fastir eða fara hægt í þæfingnum hægja á hreinsunarstörfum í borginni og eru þeir sem eru á illa búnum bílum til vetraraksturs eindregið hvattir til að leggja ekki af stað.

Þetta kemur fram í tilkynningu frá Reykjavíkurborg og er áhersla lögð á að halda öllum helstu akstursleiðum opnum en það hefur að mestu gengið upp. Víða hefur það þó gengið hægt að sögn þeirra sem standa vaktina í snjóhreinsun hjá Reykjavíkurborg.  Í verstu hryðjunum í dag lokuðust leiðir upp í Norðlingaholti um tíma, en þungfært er um alla borg.

„Bílar sem sitja fastir eða fara hægt í þæfingnum hægja á hreinsunarstörfum og eru þeir sem eru á illa búnum bílum til vetraraksturs eindregið hvattir til að leggja ekki af stað. Mikilvægt er að þeir sem hafa skilið bíla sína eftir á stofnbrautum og stærri umferðargötum hugi sem fyrst að því að koma þeim á brott.

Öll tiltæk ruðningstæki  Reykjavíkurborgar og verktaka á hennar vegum hafa verið á ferðinni í allan dag og gert er ráð fyrir að unnið verði langt fram á kvöld af fullum krafti, allt frá Granda upp í Úlfarsárdal.  Síðan verða snjóruðningstæki ræst á nýjan leik í nótt klukkan fjögur. Ekki verður farið í húsagötur að sinni heldur lögð áhersla á allar meginleiðir, stofnbrautir og fjölfarnari umferðargötur.“