Kvikmynd um verstu óperusöngkonu heims í bígerð

Leikkonan Meryl Streep hefur tekið að sér hlutverk Florence Foster Jenkins, bandarískrar óperusöngkonu sem vakti mikla athygli á fyrri hluta 20. aldar fyrir algjöran skort sinn á sönghæfileikum. Myndin mun víst bera heitið Florence og mun Hugh Grant koma til með að leika eiginmann Jenkins og umboðsmann.

Jenkins kom úr efnaðri fjölskyldu og nýtti auð sinn í að halda tónleika í hinum og þessum tónleikahöllum víðsvegar um Bandaríkin. Hún var rammfölsk og hélt ekki takti, en svo sannfærð var hún um sitt eigið ágæti að hún líkti sér við heimsþekktar söngkonur á borð við Frieda Hempel og Luis Tetrazzini og vísaði gagnrýni og hlátrasköllum á bug sem „öfundsýki.“

Þessi einstaka kona vakti smám saman áhuga áhorfenda og undir lok ferils hennar var fólk tilbúið að borga fúlgur fjár til að sjá hana á tónleikum, enda engu öðru líkt að hlýða á hana flytja heimsþekktar aríur á borð við Næturdrottningu Mozarts (sem heyra má í spilaranum hér fyrir neðan).

„Fólk segir kannski að ég geti ekki sungið, en enginn getur sagt að ég hafi ekki sungið,“ er haft eftir hinni mjög athyglisverðu Jenkins.