Loksins getur þú leiðrétt innsláttarvillurnar þínar á Instagram

Stjórnendur Instagram hafa loksins áttað sig á því að það er mannlegt að gera mistök. Nú er búið að breyta smáforritinu með þeim hætti að notendur geta breytt og lagað texta sem þeir skrifa í forritinu.

Nú er því runninn upp sá dagur að það er hægt að leiðrétta pínlegar innsláttarvillur.

Í bloggfærslu á vefsíðu Instagram segir að þessi möguleiki hafi verið einn sá eftirsóttasti af notendum smáforritsins. Fleiri breytingar eru í nýju uppfærslunni en engin jafn stór og þessi.

Til að fá þennan möguleika í símann þinn þarftu að uppfæra forritið.