Búið spil hjá Robin Wright og Ben Foster

Leikkonan Robin Wright er búin að slíta trúlofun við unnusta sinn til tíu mánaða, leikarann Ben Foster samkvæmt heimildum tímaritsins Us Weekly.

„Hún gleymdi sér í trúlofuninni síðustu jól en þegar varð brjálað að gera í vinnunni gerði hún sér grein fyrir að þetta var ekki rétt ákvörðun,“ segir heimildarmaður tímaritsins um ástæðu sambandsslitanna.

Þá spilaði fjórtán ára aldursmunur parsins stórt hlutverk í ákvörðun leikkonunnar.

„Bilið var á endanum of mikið. Ben var frekar óþroskaður,“ segir heimildarmaðurinn.

Ben og Robin kynntust á setti kvikmyndarinnar Rampart árið 2011 en Robin sást fyrst með trúlofunarhring á fingri í janúar á þessu ári.

Þetta hefði orðið þriðja hjónaband Robin en hún var áður gift Dane Witherspoon og Sean Penn, en með þeim síðarnefnda á hún börnin Dylan, 23 ára og Hopper Jack, 21 árs.