Frímann gengur nakinn niður Skólavörðustíginn

„Ég held að hann hafi greyið hellt sér út í þetta af aðeins meira kappi en forsjálni. Ég hef grun um að hann sjái aðeins eftir þessu og ég deili áhyggjum hans,“ segir leikarinn Gunnar Hansson.

Gunnar framleiðir nýtt dansverk, VIVID, með eiginkonu sinni, dansaranum Unni Elísabetu Gunnarsdóttur. Þau hafa hafið söfnun á hópfjármögnunarsíðunni Karolina Fund fyrir launum þeirra listamanna sem koma að verkinu. Til að hjálpa við fjármögnunina leitaði Gunnar til vinar síns, lífskúnstnerins og bóhemsins Frímanns Gunnarssonar. Áætlað er að safna einni milljón króna fyrir VIVID en ef einstaklingur eða fyrirtæki gefur hálfa milljón ætlar Frímann að ganga nakinn niður Skólavörðustíginn, einungis hulinn auglýsingaspjöldum að framan og aftan.

„Ég held að það sé hægt að tala hann til ef við náum takmarkinu að hann gangi nakinn niður Skólavörðustíginn. En ef það gerist að einhver borgar þessa hálfu milljón má sá hinn sami velja hvaða auglýsingaskilti Frímann hylur sig með. Svo ætlar hann að gera sitt besta til að flytja ljóð á leiðinni,“ segir Gunnar en Frímann er orðinn ansi kvíðinn yfir þessu uppátæki sínu. 

„Greyið er í miklum vandræðum með að réttlæta þetta og því setur hann þetta í menningarlegan og táknrænan búning. Hann er dauðkvíðinn fyrir þessu og þarna sýnir hann hvað hann er tilbúinn að gera fyrir íslenska menningu. En svo áttaði hann sig allt í einu á því að þetta er í desember og þá er ekkert sérstaklega hlýtt. Það skapar alls konar vandamál fyrir hann. En hann átti sér drauma um að verða dansari og þetta er hans leið til að styðja við danslistina,“ segir Gunnar og bætir við að það sé engin tilviljun að Frímann ákvað að ganga niður Skólavörðustíginn.

„Það er meiri menningargata en til dæmis Laugavegur. Efst á Skólavörðustíg stendur svo Hallgrímskirkja sem sumir myndu meina að væri fallusartákn en Frímann er því ósammála. Fyrir honum snýst þessi ganga um að sanna hversu erfitt líf listamannsins er,“

VIVID verður frumsýnt í Kassanum í Þjóðleikhúsinu þann 28. desember næstkomandi en  daginn áður verður haldin sérstök styrktarsýning fyrir verkið. Þeir sem styrkja verkið á Karolina Fund geta meðal annars fengið miða á styrktarsýninguna, einkatíma í jóga eða einkateboð með sjálfum Frímanni.

VIVID fjallar um „það að þora að brjótast útúr rammanum, að þora að vera öðruvísi og þora að lifa lífinu,“ eins og stendur á styrktarsíðunni á Karolina Fund. Gunnar hefur mikla trú á verkinu.

„Ég get sagt það sem eiginmaður Unnar að ég veit að þetta verður sjúklega flott sýning. Ég er tilbúinn til að gera allt sem ég get til að láta hana verða að veruleika. Það er frábært listafólk sem stendur að þessari sýningu. Við eigum svo færa dansara og þegar ég horfi á dans finnst mér eins og ég sé að horfa á tónlist. Ég hef farið mikið á danssýningar undanfarin ár og þær eru nánast án undantekningar virkilega góð skemmtun. Það er einhver algjör galdur í þessu.“