Töfrar tælensku eyjunnar Koh Tao á myndbandi

Fáir staðir í heiminum bjóða upp á betri eða ódýrari aðstöðu til köfunar en Tæland. Eftir nokkura daga dvöl í Bangkok héldum við Diddi af stað í ferðalag til eyjunnar Koh Tao við vesturströnd landsins.

Til að komast þangað tókum við rútu að næturlagi sem ók með okkur í um það bil 8 klukkustundir suður að bænum Chumporn. Þaðan tókum við svo ferju sem sigldi með okkur yfir í eyjunna.

Sú sigling tók um það bil 4 klukkutíma þannig að þetta var bæði langt og erfitt ferðalag.

Þegar við hinsvegar náðum landi í Koh Tao sáum við að ferðin var vel þess virði enda ljóst að við vorum lentir í hreinni náttúruparadís.

Á Koh Tao eyddum við svo næstum dögum í huggulegum strandkofa sem var staðsettur rétt við ströndina, sem var mjög þægilegt þar sem við vorum komnir þarna fyrst og fremst til þess að busla í sjónum. 

Í myndbandinu hér fyrir ofan má sjá upptökur okkar frá þessari frábæru eyju. Við festum á filmu skemmtilegt efni  neðansjávar sem ættu að heilla alla þá sem hafa áhuga draumkenndri náttúru og sannkölluðum ævintýramyndum. 

Vinirnir Frosti Logason og Sigurður Þorsteinsson fara í haust í sex vikna ferðalag um Asíu og Afríku. Þeir ætla að leyfa lesendum Vísis að fylgjast með ferðalaginu í máli, myndum og myndböndum. Félagarnir fara meðal annars í safarí í Suður-Afríku, fara á brimbrettanámskeið á Balí og læra að kafa í Taílandi. Verkefnið gengur undir heitinu AsíAfríka.