Hamingjusamasta fátækrahverfi í heimi

Soweto er eitt sögufrægasta fátækrahverfi Suður Afríku og þó víðar væri leitað. Hverfið byggðist upp á meðan aðskilnaðarstefna hvíta minnihlutans réð ríkjum í landinu en hún var við lýði mestan part tuttugustu aldarinnar. Uppþotin í Soweto árið 1976 urðu kveikjan að andstöðunni við aðskilnaðarstefnuna sem síðan leið undir lok árið 1991.

Heimsókn okkar í hverfið var sérstök upplifun. Við dvöldum þar í tvo daga á hosteli sem heitir Lebo´s Soweto Backpackers. Eigandinn heitir auðvitað Lebo og er mjög afslappaður náungi sem lifir eftir lífsreglum rastafari stefnunnar. Bob Marley, Snoop Lion og allskyns reggí tónlist hljómar hér stöðugt í hátalara kerfinu.

Staðurinn er skreyttur eins og strandkofi á Jamaíka. Bambus, hvítur sandur og trópíkalskur gróður er hér allt um lykjandi. Þar er rekinn hjólaleiga og við skelltum okkur auðvitað í fjögurra tíma túr um hverfið ásamt innfæddum leiðsögumanni. 

Lebo opnaði hostelið fyrir ellefu árum síðan. Þá var ekkert farfuglaheimili í Soweto og þess vegna má segja að hann hafi verið ákveðinn brautryðjandi í því að fá almenna ferðamenn í hverfið. Lebo er af þessum sökum ákaflega vel liðinn í nágrenninu og gestir hans fá alls staðar höfðinglegar móttökur. Lebo´s Soweto backpackers er enn þann dag í dag eina farfuglaheimilið í Soweto. 

Í Soweto, búa rúmar þrjár milljónir svartra Suður-Afríkubúa við þröngan kost. Minnsta vindhviða virðist geta feykt óhrjálegum kofunum út í veður og vind. En fólkið hér virðist vera mjög hamingjusamt. Það kom okkur skemmtilega á óvart. 

Okkur var allstaðar vel tekið og ávallt með vinalegu viðmóti. Þarna ríkja ákveðnir tískustraumar, bæði í tónlist og fatnaði og íbúarnir eru mjög stoltir af öllu því sem viðkemur Soweto. Það er mikið af svölum töffurum í Soweto.

Á ferð okkar um hverfið stoppuðum við á mjög frumstæðu veitngahúsi sem bauð upp á einskonar þjóðarrétt Soweto. Þar er um að ræða soðið kjöt af höfði beljunnar, ekki ósvipað íslenskum sviðahausum.

Þetta var borið fram með haframjöli, salti og pipar og svo skolað niður með bjór úr fernu. Á staðnum var ekkert rennandi vatn þannig að gestir fengu að dífa höndunum ofan í kalt vatn í rauðum bala áður en byrjað var að borða. Þannig var ítrasta hreinlætis gætt. Mjög sérstök máltíð sem var snædd inn í kofa sem samanstóð einungis af bárujárnsplötum á alla kanta. 

Krakkarnir í Soweto virðast vera hamingjusömustu börn í heimi. Þau umvefja mann með þéttu faðmlagi um leið og þau sjá mann á meðan foreldrar þeirra standa álengdar og hlæja.

Stemmningin hér er engu lík og upplifunin af heimsókninni mun jákvæðari en maður hefði nokkurn tíman getað ímyndað sér. Það er frábært að koma til Soweto.

Vinirnir Frosti Logason og Sigurður Þorsteinsson fara í haust í sex vikna ferðalag um Asíu og Afríku. Þeir ætla að leyfa lesendum Vísis að fylgjast með ferðalaginu í máli, myndum og myndböndum. Félagarnir fara meðal annars í safarí í Suður-Afríku, fara á brimbrettanámskeið á Balí og læra að kafa í Taílandi. Verkefnið gengur undir heitinu AsíAfríka.