Metsöluhöfundur hneykslar með ummælum um barnaníðinga

Bandaríski metsöluhöfundurinn John Grisham er í viðtali við breska miðilinn The Telegraph þar sem hann telur meðal annars að þeir sem skoði barnaklám fái of þungar refsingar.

„Fangelsi eru full af karlmönnum á mínum aldri. Sextugum, hvítum mönnum í fangelsi sem hafa aldrei skaðað neinn, sem myndu aldrei snerta börn,“ segir John sem er nú að kynna nýjustu bók sína, Gray Mountain.

„En þeir fara á netið eitt kvöld og byrja að skoða sig um, örugglega búnir að drekka of mikið, og ýta á vitlausan hnapp, fara of langt og sjá barnaklám,“ bætir rithöfundurinn við.

Ummæli Johns eru afar umdeild en í viðtalinu segir hann einnig sögu af góðum vini sínum.

„Hann drakk alltof mikið og fór á vefsíðu. Hún hét „Sextán ára stelpur sem vilja vera vændiskonur“ eða eitthvað þvíumlíkt. Og það stóð: Sextán ára stelpur. Og hann fór inn á síðuna. Byrjaði að hlaða niður efni - þetta voru sextán ára stelpur sem litu út fyrir að vera þrítugar. Hann hefði ekki átt að gera þetta. Það var heimskulegt, en þetta voru ekki tíu ára strákar. Hann snerti engan. Og Guð, viku seinna var bankað á dyrnar: FBI! Þá kom í ljós að síðan var búin til af kanadísku lögreglunni til að ná fólki - kynferðisafbrotamönnum - og hann fór í fangelsi í þrjú ár,“ segir John.

„Það eru svo margir af þeim núna. Það eru svo margir „kynferðisafbrotamenn“ - það er það sem þeir eru kallaðir - að þeir eru settir í sama fangelsi. Eins og þeir séu öfuguggar eða eitthvað - þúsundir af þeim,“ bætir hann við. Hann segist þó ekki hafa samúð með barnaníðingum.

„Ég hef enga samúð með alvöru barnaníðingum. Endilega læsið það fólk inni. En margir af þessum mönnum eiga ekki stranga fangelsisdóma skilið og það er það sem þeir fá.“