Viðskipti innlent

Vantar íbúðir fyrir tugi nýrra starfsmanna á Vestfjörðum

Kristján Már Unnarsson skrifar
Höskuldur Steinarsson, framleiðslustjóri Fjarðalax.
Höskuldur Steinarsson, framleiðslustjóri Fjarðalax. Stöð 2/Egill Aðalsteinsson.
Fiskeldisfyrirtækið Fjarðalax er að ráða 25 nýja starfsmenn á sunnanverðum Vestfjörðum um þessar mundir. Skortur á íbúðarhúsnæði veldur vandkvæðum.

Fjarðalax hefur leitt hraða uppbyggingu fiskeldis á sunnanverðum Vestfjörðum en aðeins eru fimm ár frá því fyrirtækið tók til starfa. Höskuldur Steinarsson, framleiðslustjóri fyrirtækisins, segir að þeir hafi verið þrír sem byrjuðu en nú séu starfsmennirnir 57 talsins.

Fyrstu laxaseiðin voru sett í sjókvíar í Tálknafirði en Fjarðalax er jafnframt með kvíar í Arnarfirði og Patreksfirði og er einn fjarðanna jafnan hvíldur. Fyrir þremur árum hófst vinnsla á laxi á Patreksfirði en þar er fjölmennasta starfsstöðin. Þaðan er laxinn sendur ferskur á markaði.

Úr fiskvinnslu Fjarðalax á Patreksfirði. Laxinum pakkað ferskum til útflutnings.Stöð 2/Egill Aðalsteinsson.
Höskuldur segir að fyrirtækið hafi á undanförnum vikum ráðið fimmtán manns og verið sé að auglýsa eftir fleirum til starfa, eins og skipstjórum, vélstjórum og gæðastjóra. 

„Þannig að við erum að bæta við fólki með þekkingu og reynslu,” segir Höskuldur og býst við að tíu starfsmenn til viðbótar bætist við á næstu vikum. 

Framleiðslan í ár stefnir í yfir tvöþúsund tonn, en í fyrra var selt fyrir tólfhundruð milljónir króna. Á þessu ári stefna gjaldeyristekjur Fjarðalax í tvo milljarða króna, sem er ekki svo lítil viðbót í þjóðarbúið frá byggðunum á sunnanverðum Vestfjörðum. 

En hvernig gengur að fá fólk til að starfa? 

„Það er svolítið tak að fá Íslendinga til að flytja vestur á firði, ég skal viðurkenna það. En þetta er að breytast. Við finnum það. Það er mikill áhugi að koma núna. Það er ungt fólk, fólk með menntun og reynslu, - og fjölskyldur, - sem hefur beinlínis áhuga á að koma,” svarar Höskuldur.

Frá Patreksfirði. Þar heyrast reyndar hamarshögg þessa dagana úr húsinu hægra megin á myndinni sem verið er að endurbyggja og stækka.Stöð 2/Egill Aðalsteinsson.
En ekki er nóg að hafa atvinnuna. Fjölskyldur þurfa líka að hafa þak yfir höfuðið. 

„Það er húsnæðisvandamál að myndast á sunnanverðum Vestfjörðum í kringum þessa starfsemi. Það vantar íbúðarhúsnæði. Þannig að það er næsta stóra verkefni, að bæta í hvað varðar innviði samfélagsins.”


Tengdar fréttir

Sjá umhverfisvænt fiskeldi sem lyftistöng Vestfjarða

Helsta fiskeldisfyrirtæki Vestfjarða, Hraðfrystihúsið Gunnvör í Hnífsdal, hefur nú sótt um að hefja eldi regnbogasilungs í Ísafjarðardjúpi eftir margra ára bið eftir leyfi til laxeldis.

Dýrfiskur hleypir fjöri í Flateyri

Dýrfiskur er að tífalda eldi regnbogasilungs í Dýrafirði, sem kallar á fleiri störf á Vestfjörðum, mest við fiskvinnslu á Flateyri. Eftir langvarandi erfiðleika í atvinnumálum á Flateyri sjást nú merki um að farið sé að rofa til.

Matthías mættur til að skapa 150 störf á Bíldudal

Laxeldi stefnir í að valda byltingu á Vestfjörðum á næstu árum og skapa mörghundruð störf. Matthías Garðarsson, fiskeldisfrömuður í Noregi, kom til landsins fyrir helgi til að byggja upp 150 manna fyrirtæki á Bíldudal.

Laxeldi á Vestfjörðum eins og ígildi álvers

Uppbygging laxeldis stefnir í að hafa sambærileg og jafnvel meiri áhrif á sunnanverðum Vestfjörðum og stóriðjuframkvæmdirnar höfðu fyrir Austurland, segir bæjarstjóri Vesturbyggðar.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.