Refsing Pistorius ákveðin 13. október

Dómari mun tilkynna um refsingu Oscars Pistorius þann 13. október, en suður-afríski spretthlauparinn var fundinn sekur um manndráp af gáleysi í morgun. Dómurinn hefur úrskurðað að Pistorius skuli vera laus gegn tryggingu til 13. október.

Pistorius varð unnustu sinni, Reevu Steenkamp að bana á heimili sínu í Pretoríu í febrúarmánuði 2013.

Pistorius gæti átt yfir höfði sér allt að fimmtán ára fangelsisvist, en í frétt BBC segir að sérfræðingar telji líklegt að sjö til tíu ára fangelsisvist verði niðurstaðan.

Saksóknarar í málinu hafa lýst yfir vonbrigðum sínum með að Pistorius hafi ekki verið sakfelldur fyrir morð, en að þeir munu ekki taka ákvörðun um hvort dómnum yrði áfrýjað fyrr en eftir ákvörðun refsingar.