Læknir Brasilíumanna segir að Neymar verði ekki meira með á HM

Læknir brasilíska landsliðsins í fótbolta staðfesti í kvöld að Neymar, aðalstjarna brasilíska landsliðsins, verði ekki meira með á HM í fótbolta í Brasilíu en framherjinn snjalli meiddist á baki í kvöld í 2-1 sigri Brasilíu á Kólumbíu.

Neymar brákaðist á hryggjarlið þegar hann fékk þungt högg í bakið frá Juan Zuniga, varnarmanni Kólumbíu. Neymar var borinn af velli og fluttur á sjúkrahús.

Luiz Felipe Scolari sagði á blaðamannafundi eftir leikinn að menn hafi verið með veiðileyfi á Neymar í síðustu þremur leikjum en þá var hann ekki búinn að fá það staðfest að Neymar geti ekki verið með í undanúrslitaleiknum á móti Þýskalandi.

„Þetta er ekki svo alvarlegt að hann þurfi að fara í aðgerð en hann má ekkert hreyfa sig næstu daga á meðan hann er að ná sér," sagði Rodrigo Lasmar, læknir brasilíska liðsins í sjónvarpsviðtali í Brasilíu í kvöld.

Neymar hefur skorað fjögur mörk í fyrstu fimm leikjum Brasilíu á HM og lagði upp fyrra mark liðsins í sigrinum á Kólumbíu.

Brasilía verður því bæði án Neymar og fyrirliðans Thiago Silva í undanúrslitaleiknum á móti Þýskalandi en Thiago Silva tekur þá út leikbann.