Framsýn segir kjarasamninga kolfalla

Verkalýðsfélagið Framsýn á Húsavík segir í ályktun að fyrir liggi að kjarasamningar aðildarfélaga ASÍ sem undirritaðir voru í desember 2013 séu kolfallnir.

Bent er á að þeir hafi byggt á því að breið samstaða næðist í samfélaginu um stöðugleika og hóflegar launahækkanir til að halda niðri verðbólgu. Að mati Framsýnar er hinsvegar ljóst að aðrir hópar launþega séu ekki klárir í þessa vegferð og hafa krafist og fengið margfalt þær hækkanir sem félagsmenn innan ASÍ fengu í desember. Því komi ekkert annað til greina en að aðildarfélög ASÍ krefjist þess sama fyrir sína umbjóðendur í næstu kjarasamningum og aðrir hópar launafólks hafa fengið í launahækkanir undanfarnar vikur og mánuði.

Félagið vill ennfremur mynda breiða samstöðu innan aðildarfélaga ASÍ um þetta markmið, þannig að hægt verði að koma í veg fyrir að félagsmenn innan ASÍ sitji enn og aftur eftir meðan aðrir hópar launafólks skammti sér vel á diskana  í boði samtaka atvinnurekenda, eins og það er orðað. Slíkt athæfi sé ólíðandi með öllu.