"Ég mun snúa aftur til Húsavíkur“

„Ég mun snúa aftur til Húsavíkur“ segir einn af síðustu starfsmönnum Vísis í Norðurþingi. Um sjötíu starfsmenn munu á næstu vikum flytja til Grindarvíkur til að vinna í nýjum starfsstöðum útgerðarfélagsins. 

Vísir hf hefur ákveðið að loka vinnslustöðvum sínum á Þingeyri, Djúpavogi og Húsavík. Í raun er lítið eftir af starfsemi Vísis á Húsavík.

Fáir voru á ferli á skrifstofum Vísis á Húsavík þegar fréttastofu bar þar að garði. Hin pólska Irene tók loks á móti okkur. Irene er ein af fjölmörgum starfsmönnum Vísis á Húsavík sem ákveðið hafa að flytjast með fyrirtæki sínu til Grindavíkur.

Irene baðst undan viðtali en sagði okkur þó að sú ákvörðun Vísis að hætta starfsemi í Norðurþingi hefði verið mikið áfall. Og þetta er einnig áfall fyrir atvinnulífið og í raun allt samfélag Norður-Þingeyinga. Um hundrað og fimmtíu manns hefur verið sagt upp, þar af sjötíu á Húsavík þar sem flestir hafa ákveðið að flytja til Grindavíkur.

Norðurþing hefur formlega óskað eftir því að fá endurkeyptar eignir Vísis á Húsavik. Jafnframt er óskað eftir viðræðum um kaup á allt að sjö hundruð þorskígildistonnum af aflaheimildum Vísis hf.

Irene, sem búið hefur á Húasvík árum saman, er þó bjartsýn, enda býr fjölskylda hennar fyrir sunnan.

Eftir dágóða leit fundum við félagana Ragnar og Sævar. Þeir stóðu í ströngu við löndun fyrir fiskmarkaðinn. Vinirnir, sem búa saman á Húsavík ásamt unnustum sínum, verða með síðustu starfsmönnum Vísis til flytja til að Grindavíkur.

Sp.blm. Hvernig tilfinning er það að vera pakka saman vinnustað sínum til að flytja með honum þvert yfir landið?

„Það er skrýtið,“ segir Ragnar Björnsson, starfsmaður Vísis á Húsavik. „En maður er nokkuð sáttur og reynir að horfa bjartsýnis augum á þetta allt. Það eru bjartir tímar framundan.“

Samstarfsfélagi og vinu hans, Sævar Ólafsson, tekur í sama streng.

„Þetta er allt mjög tvísýnt. Margir nýlega búnir að kaupa íbúðir. Aðrir eru með börn. En mér finnst flestir vera mjög bjartsýnir.“

Þó svo að þessir spræku synir Húsavíkur haldi nú á brott eru þeir sannfærðir um þeir muni snúa aftur einn daginn.

„Ég er náttúrulega alltaf tengdur Húsavík. Ég á eftir að koma hingað aftur,“ segir Sævar.

„Það er fisktækniskóli í Grindavík. Maður getur stefnt á hann. Reyna að fitja sig upp í þessari veröld,“ segir Ragnar.

Húsavík missir á næstu vikum tugi starfsmenn Vísis til Grindavíkur. Þetta er ungt fólk, barnafólk og raunveruleg blóðtaka fyrir sveitarfélagið.

Húsvíkingar horfa nú til Bakka þar sem kísilmálmverksmiðja mun rísa á næstu árum. Sveitarstjórnarmenn eru vongóðir um að fjármagn verði tryggt seinna í sumar.