Guðni Ágústsson er orðinn KR-ingur

Guðni Ágústsson verður aðalræðumaður og skemmtikraftur á Herrakvöldi KR-inga sem fram fer 25. þessa mánaðar. Eins og fram hefur komið ítrekað í fréttum nú yfir páskana er Guðni undir feldi að íslenskum sið og mun, á sumardaginn fyrsta, tilkynna hvort hann ætli leiða Framsóknarmenn í komandi borgarstjórnarkosningum. Flest bendir til þess að Guðni muni taka slaginn.

Vísir hefur heimildir fyrir því að verulegur urgur sé innan raða KR-inga með það að Guðni skuli vera aðalnúmerið á Herrakvöldinu, ekki síst í ljósi þessara pólitísku vendinga. Formaður knattspyrnudeildar KR, Kristinn Kjærnested, kannast hins vegar ekki við neina óánægju.

„Guðni var hjá okkur 2011 og fór þá á kostum. Það þarf að bóka þessa menn í tíma, hvort heldur þeir heita Guðni eða Logi Bergmann, sem verður veislustjóri. Ég hef ekki heyrt að það sé urgur vegna Guðna.“

Menn hafa orðið til að benda á að Guðni Ágústsson geti verið býsna grófur og jafnvel klámfenginn þegar hann fer með sín gamanmál en Kristinn hlær spurður hvort Guðni sé fenginn til að segja KR-ingum dónalega brandara. „Ég hef oft heyrt í honum og mér finnst enginn komast með tærnar þar sem hann hefur hælana. Við væntum mikils af Guðna í skemmtilegheitum og fjölmenni. Á Hallveigarstígnum.“

Kristinn segir KR-inga og Guðna eiga það sameiginlegt að vera umdeildir og það sé styrkur fremur en veikleiki. „Guðni kemur til með að krydda kvöldið hvort sem hann verður búinn að tilkynna framboð sitt eða ekki,“ segir Kristinn og bætir í og tilkynnir að Guðni sé nú orðinn KR-ingur, sem er nýtt varðandi Flóamanninn Guðna. „Það kom fram á Bylgjunni nýlega. Barnabarn hans er í KR. Þannig að nú sem endranær væntum við mikils af Guðna, í það minnsta í skemmtilegheitum. Hann mun frekar trekkja að en hitt. Það er ljós. Jafn ljóst og að kvöldið verður 25.,“ segir Kristinn sem sér ákveðin tækifæri í því fyrir KR fljúgi Guðni inn í borgarstjórn og jafnvel alla leið í borgarstjórastólinn.