Þórisvatn ekki lægra frá upphafi mælinga

Stærsta vatnsforðabúr Landsvirkjunar, Þórisvatn, náði þann 3. apríl lægstu vatnshæð sem mælst hefur frá upphafi. Vatnsyfirborðið var þá í 560 metrum yfir sjávarmáli og 31 sentímetra betur. Það er um ellefu metrum undir meðaltali Þórisvatns á þessum tíma árs, að því er fram kemur á heimasíðu Landvirkjunar. 

Góðu fréttirnar eru þær að síðan þá hefur orðið breyting til batnaðar.

„Í byrjun þessarar viku hófst hægfara leysing á hálendinu. Rennsli í Tungnaá, Þjórsá og Blöndu hefur aukist og vatnshæð Þórisvatns hefur farið hægt hækkandi með hverjum degi frá 3. apríl,“ segir í frétt fyrirtækisins.

Tímabundið aukið rennsli í ám hefur skilað sér í hækkun á vatnshæð í Þórisvatni og Blöndulóni. Batinn er þó ekki nægur til að draga úr raforkuskerðingum. 

„Ef miðað er við að innrennsli fram til vors verði samkvæmt lægstu spám þá hefur staðan ekki batnað nógu mikið til að hægt sé að aflétta skerðingum.“

Landsvirkjun segir tíðarfar á yfirstandandi vetri hafa verið mjög óhagstætt og innrennsli í lón afbrigðilegt. Rennsli í Tungnaá hafi framan að vetri verið minna en finna má í mælingum síðustu 55 árin og rennsli í Blöndu hafi verið nálægt sögulegu lágmarki.