Alcoa Fjarðaál dregur úr framleiðslu

Alcoa Fjarðaál í Reyðarfirði ætlar að draga úr framleiðslu álversins í ljósi boðaðrar orkuskerðingar Landsvirkjunar. Orkufyrirtækið tilkynnti í dag um skerðingu á umframorku vegna lágrar vatnsstöðu í Blöndulóni og Þórisvatni. 

Álverið ætlar í framhaldinu að slökkva á allt að tíu prósentum af þeim 336 kerum sem fyrirtækið starfrækir. Fyrirtækið áætlar að framleiðslutap þess muni nema tæpum níu þúsund tonnum á tímabilinu. Aðgerðirnar eigi ekki að hafa nein áhrif á vöruflæði til viðskiptavina. 

„Þetta er annað árið í röð sem Landsvirkjun tilkynnir Fjarðaáli um fyrirhugaða orkuskerðingu. Í samráði við Landsvirkjun og til að lágmarka áhættu vegna boðaðrar skerðingar þá, greip Fjarðaál til þeirra aðgerða að draga strax úr framleiðslu. Áætlað er að orkuskerðingin í ár standi frá 20. febrúar til aprílloka nema jákvæðar breytingar verði á vatnsmagni uppistöðulónanna," segir í tilkynningu Alcoa Fjarðaáls.