„Við vorum bara að framfylgja hans vilja"

Eins og Stöð 2 og Vísir hafa sagt frá áður liggur fyrir Alþingi frumvarp um ætlað samþykki til líffæragjafa, en með því verður látinn einstaklingur sjálfkrafa gjafi nema hann hafi lýst öðru yfir. Aðstandendur hafa þó lokaorðið. Markmiðið er að fjölga gjöfum en í nýju áliti velferðarnefndar er lagst gegn hugmyndinni.

„Breyting á löggjöfinni ein og sér dugar ekki til að ná markmiðum frumvarpsins, það er að fjölga líffæragjöfum úr látnum einstaklingum. Það sanna dæmi frá öðrum löndum,“ segir Þórunn Egilsdóttir, varaformaður velferðarnefndar og flutningsmaður nefndarálitsins. „Það þarf miklu meira að fylgja með svo við náum þessu markmiði og við leggjum áherslu á að það náist með aukinni fræðslu, upplýsingu, þjálfun og svo framvegis.“

Nefndin styður hins vegar tillögu aðstandenda Skarphéðins Andra Kristjánssonar, sem lést í bílslysi í janúar en bjargaði fimm mannslífum með líffæragjöf sinni, um að 29. janúar verði gerður að degi líffæragjafa. Þann dag gaf Skarphéðinn hina stóru gjöf og þá hófst umræða um líffæragjöf hans, með viðtali á Stöð 2.

Foreldrar hans vilja opna umræðu um líffæragjafir.

„Við vitum aldrei hvenær eitthvað kemur fyrir en þá er ofboðslega gott að vera með þetta á hreinu,“ segir Steinunn Rósa Einarsdóttir, móðir Skarphéðins Andra.

Hvernig er ykkar reynsla af þessu líffæragjafarferli?

„Mjög góð,“ segir Steinunn og faðir Skarphéðins Andra, Kristján Ingólfsson, tekur undir. „Þetta er bara ljós í myrkrinu, maður hefur þarna smá ljós á móti öllu myrkrinu.“

Þannig að það hefur ekki verið erfitt fyrir ykkur að taka þessi skref?

„Nei, ekki fyrst hann var búinn að taka ákvörðunina sjálfur,“ segir Steinunn. „Við vorum bara að framfylgja hans vilja,“ bætir Kristján við.

Þau hvetja loks alla til að ræða líffæragjafir opinskátt við fólk í sínu umhverfi.

„Og taka afstöðu, hver sem hún er,“ segir Steinunn að lokum.