Fréttamaður Rúv aldrei upplifað önnur eins viðbrögð

„Við höfum óskað eftir formlegum skýringum frá ráðuneytinu,“ segir Kári Gylfason, fréttamaður RÚV, sem neitað var um viðtal við utanríkisráðherra, Gunnar Braga Sveinsson í hádeginu í dag.

Líkt og Vísir greindi frá og birti myndband af þá fékk RÚV ekki viðtal við utanríkisráðherra að loknum fundi í Utanríkismálanefnd í hádeginu í dag. Fréttamenn frá Rúv og Stöð 2 voru mættir á vettvang og fór svo að Gunnar Bragi ræddi aðeins við Heimi Má Pétursson, fréttamann Stöðvar 2.

Kári útskýrir í samtali við Vísi að hann hafi haft samband við aðstoðarkonu ráðherra um tíuleytið í morgun og óskað eftir viðtali í kringum fundinn í hádeginu. Því hafi verið svarað til að ráðherra væri á hraðferð. Kári segist hafa beðið um símtal og fá að vita hvort af viðtalinu gæti orðið eður ei.

Fréttamaðurinn var svo mættur um tólfleytið og beið þess að ráðherra mætti á fundinn. Það gerði hann um tíu mínútum síðar og spurði Kári við það tilefni hvort hann gæti veitt Rúv viðtal. Hann væri meðvitaður um að ráðherra væri á hraðferð en óskaði eftir tveimur mínútum með honum.

„Ef það er beint eða ég fæ það óklippt,“ sagði Gunnar Bragi að sögn Kára sem brá við viðbrögðum ráðherrans. Gunnar Bragi hafi svo haldið leið sinni áfram og Kári, sem hefur starfað hjá Rúv með hléum frá árinu 2007, vissi ekki hvaðan á sig stóð veðrið. Hann hafi aldrei upplifað slík viðbrögð og vissi hreinlega ekki hvað Gunnar Bragi ætti við með svörum sínum.

Kári segir Heimi Má Pétursson, fréttamann Stöðvar 2, hafa mætt í kjölfarið og saman hafi þeir beðið þess að fundi lyki. Ljóst væri að ráðherra fengi enga sérmeðferð hjá Kára sem aftur fékk neitun á viðtali eins og sjá má í myndbandi sem Vísir birti fyrr í dag. Gunnar Bragi veitti hins vegar fréttastofu Stöðvar 2 viðtal.

Í kjölfarið ræddi Kári við aðstoðarkonu Gunnars Braga, Sunnu Gunnarsdóttur Marteins, og óskaði eftir skýringum á því hvað væri hreinlega í gangi. Þá svari hún til að ráðherra hafi verið ósáttur við hvernig eldra viðtal Rúv við Gunnar Braga hafi verið klippt til. Þau vilji fá eintak af viðtalinu fari svo að Gunnar Bragi ræði við RÚV. Það hafi Kári ekki getað fallist á enda fái enginn sérmeðferð hjá RÚV.

Kári staðfestir að RÚV hafi óskað eftir formlegum skýringum frá ráðuneytinu vegna málsins.

„Að okkur skilst er þetta viðtal sem var tekið við Gunnar Braga og birt í hádegisfréttum RÚV á föstudaginn,“ segir Sigríður Hagalín Björnssdóttir, varafréttastjóri á RÚV.

Þeim hafi hins vegar ekki borist neinar athugasemdir við þær fréttir sem RÚV hafi flutt af Gunnari Braga undanfarna daga. Því hafi það komið þeim í opna skjöldu að ráðherra væri ósáttur við fréttaflutning Rúv.