Bíllinn verður að vera skotheldur

Nico Rosberg annar ökumanna Mercedes liðsins segir að nýr bíll liðsins W05 verði að vera 100% áreiðanlegur. Lykillinn að árangri á tímabilinu verður líklega áreiðanleiki. Fyrstu keppnirnar verða þar mikilvægastar. Hægt og rólega munu liðin svo læra hversu mikið vélarnar þola.

Mercedes bílinn hefur þegar sýnt að hann kemst ansi langt í einni lotu. Hins vegar er enn óljóst hversu mikið liðið hefur reynt á vélina. Hugsanlegt er að enn eigi eftir að setja þær á fullan snúning. Þá gætu bilanir farið að koma í ljós.

Samanlagt hefur Mercedes lokið 624 hringjum á 8 æfingadögum sem verða að teljast góð afköst fyrir svo nýja tækni. McLaren hefur lokið 541 hring og eru næstir á eftir Mercedes, með sömu vél.

Þrátt fyrir velgengnina var Rosberg fyrstur til að vara við of mikilli bjartsýni. Hann telur að bíllinn sé ekki enn orðin nógu áreiðanlegur. Einnig verður að hafa í huga að önnur lið, þá sérstaklega McLaren og Ferrari eru ekki langt undan.