Rækjuverksmiðju lokað og skipum lagt þegar kvótinn flyst til fyrri kvótahafa

Rækjuverksmiðju Kampa á Ísafirði verður lokað og átta til níu rækjuskipum lagt verði stór hluti rækjukvótans færður aftur til fyrri kvótahafa, eins og stjórnvöld áforma. Þetta segir Jón Guðbjartsson í viðtali í fréttum Stöðvar 2 en hann hefur undanfarin ár stundað rækjuútgerð og rækjuvinnslu á Vestfjörðum.

Fyrrverandi sjávarútvegsráðherra, Jón Bjarnason, gaf rækjuveiðarnar frjálsar fyrir fjórum árum og hleypti þannig nýjum aðilum að, mönnum eins og Jóni Guðbjartssyni, sem keypti þrjú skip til rækjuveiða og endurvakti rækjuiðnaðinn á Ísafirði. Jón segir að stjórnarfrumvarp sem er í meðförum Alþingis hafi þessar afleiðingar:

„Við ætlum að loka. Við vorum með 120-130 manns í vinnu þegar best lét. Við erum núna með 60-70 og ef það fer á versta veg þá verðum við að segja því fólki líka upp,” segir Jón Guðbjartsson, sem bæði er stjórnarformaður útgerðarfélagsins Birnis og rækjuverksmiðjunnar Kampa.

Frumvarp sjávarútvegsráðherra gerir ráð fyrir að rækjutogarar Jóns Guðbjartssonar fái kvóta sem nemur 30 prósentum af veiðireynslu síðustu þriggja ára. Jón segir sín skip ekki fara af stað aftur og býst við að 8-9 rækjuskipum verði lagt, nái breytingarnar fram að ganga, þar sem þurrkað verði yfir veiðireynslu þeirra.

Sjötíu prósent rækjukvótans fara aftur til útgerða sem höfðu rækjukvóta í gamla daga. Jón lýsir dæmi miðað við eigin kvótakaup fyrir fjórum árum:

„Ef ég nota þá verðlagningu á það sem verið er að gera núna þá vorum við búnir að afla okkur 600 milljóna króna kvóta. Það á að setja hann aftur á þá sem ekki vildu nota þessa eign fyrir 10-15 árum, - því þeir áttu þetta. Mörg af þeim fyrirtækjum, stærstu fyrirtækin á Íslandi, stóru útgerðarfyrirtækin sem eru í uppsjávaraflanum, eru ekki með skip til að veiða rækju einu sinni. Þau eru þá að fá þetta afhent núna til baka. Er þetta ekki óréttlæti?”