Nýr leikhússtjóri kynntur klukkan 11

Þorgerður Katrín Gunnarsdóttir, stjórnarformaður Leikfélags Reykjavíkur, hefur boðað starfsmenn Borgarleikhússins á fund klukkan 11.

Fundurinn mun fara fram á Nýja sviðinu í Borgarleikhúsinu og þar verður nýr leikhússtjóri kynntur til leiks.

Á annan tug manna sóttu um að taka við stöðunni af Magnúsi Geir Þórðarsyni. Hann tekur við stöðu útvarpsstjóra sem kunnugt er.

Ráðið er í starfið til fjögurra ára. Heimilt er samkvæmt samþykktum LR að endurráða leikhússtjóra önnur fjögur ár. Miðað er við að nýr leikhússtjóri taki til starfa eins fljótt og auðið er en nánari tímasetning er samkomulagsatriði.

Nöfn umsækjenda voru ekki gefin upp en nokkrir umsækjenda óskuðu nafnleyndar. Þegar staðan var auglýst laus til umsóknar var áskilið að umsækjendur greindu frá framtíðarsýn sinni í 800 orða ritgerð.