Kratus áminnt vegna ófullnægjandi frágangs á saltköku

Umhverfisstofnun var nú rétt í þessu að senda frá sér tilkynningu þar sem kemur fram að fyrirtækið Kratus hefur verið áminnt vegna frágangs á úrgangi á lóð sem ekki er í samræmi við ákvæði starfsleyfis. Kratus rekur nýlega starfsemi sem felst í því að vinna ál úr álgjalli og hefur starfað á Grundartanga.

Fyrirtækinu var veittur frestur til þess að koma sjónarmiðum sínum á framfæri og tækifæri til að bregðast við athugasemdunum en stofnunin taldi úrbótaáætlun frá 5. nóvember 2013 ófullnægjandi og gerði því frekari kröfur. Sinni Kratus þessu ekki getur Umhverfisstofnun gripið til dagsekta sem nemur hálfri milljón, allt þar til úr verður bætt. „Einnig getur stofnunin gripið til frekari aðgerða,“ segir í tilkynningunni.

Saltkaka myndast við endurvinnslu álgjalls en endurvinnslan gengur út á að endurbræða álgjall að viðbættu salti sem skilur álið frá gjallinu. „Hreint ál er þá tappað af ofninum en restin kallast saltslag eða saltkaka. [...] Saltkakan flokkast sem spilliefni þar sem að hætta er á að það myndi eldfimt gas í hættulegu magni í snertingu við vatn.“